ఏప్రిల్ 10, నేటి తెలుగు పత్రిక: ఆంధ్రప్రదేశ్ ప్రభుత్వం రిటైర్డ్ ప్రభుత్వ ఉద్యోగులు, ఉపాధ్యాయులకు శుభవార్త అందించింది. దీర్ఘకాలంగా పెండింగ్లో ఉన్న ఉద్యోగుల బకాయిల చెల్లింపులపై కీలక నిర్ణయం తీసుకుంది. ఈ క్రమంలో ఒక్కరోజే రూ.2,950 కోట్ల భారీ నిధులను విడుదల చేయడం విశేషంగా మారింది.ఈ నిధులు ప్రధానంగా పదవీ విరమణ చేసిన ఉద్యోగులకు చెల్లించాల్సిన గ్రాట్యుటీ, సరెండర్ లీవ్ బిల్లుల కోసం వినియోగించనున్నారు. మొత్తాన్ని నేరుగా లబ్ధిదారుల బ్యాంకు ఖాతాల్లో జమ చేయనున్నట్లు ఆర్థిక శాఖ అధికారులు తెలిపారు.ఈ చెల్లింపులకు ముఖ్యమంత్రి నారా చంద్రబాబు నాయుడు గ్రీన్ సిగ్నల్ ఇవ్వడంతో ప్రక్రియ వేగవంతమైంది. ఆయన ఆదేశాల మేరకు ఆర్థిక శాఖ తక్షణ చర్యలు చేపట్టింది.
పెండింగ్ బకాయిలపై ప్రభుత్వం చర్యలు
ఆర్థిక శాఖ మంత్రి నేతృత్వంలో చెల్లింపుల ప్రక్రియ కొనసాగుతోంది. మొత్తం రూ.7,059 కోట్లకు పైగా పెండింగ్ బకాయిలను దశలవారీగా క్లియర్ చేయాలని ప్రభుత్వం లక్ష్యంగా పెట్టుకుంది.మొదటి దశలోనే భారీ మొత్తాన్ని విడుదల చేయడం ద్వారా ఉద్యోగుల్లో విశ్వాసం పెరిగిందని అధికారులు పేర్కొన్నారు.
ఇతర బకాయిలపై కూడా చర్యలు
కేవలం రిటైర్డ్ ఉద్యోగులకే కాకుండా చిన్న కాంట్రాక్టర్లు, సరఫరాదారుల బకాయిలను కూడా ప్రభుత్వం క్లియర్ చేస్తోంది. ఇప్పటికే రూ.614 కోట్ల బిల్లులు చెల్లించినట్లు సమాచారం.ప్రస్తుతం సేవలో ఉన్న ఉద్యోగుల సరెండర్ లీవ్ బిల్లుల చెల్లింపులు కూడా కొనసాగుతున్నాయి.
ఉద్యోగుల్లో హర్షం
ఈ నిర్ణయంతో రిటైర్డ్ ఉద్యోగులు, ఉపాధ్యాయులు, వారి కుటుంబాల్లో సంతోషం వ్యక్తమవుతోంది. తమ దీర్ఘకాల నిరీక్షణకు ముగింపు లభించిందని వారు హర్షం వ్యక్తం చేస్తున్నారు.
