ఏప్రిల్ 09, నేటి తెలుగు పత్రిక: సమాజ అభివృద్ధికి కార్పొరేట్ సోషల్ రెస్పాన్సిబిలిటీ (సీఎస్ఆర్) నిధులను సమర్థవంతంగా వినియోగించాల్సిన అవసరం ఉందని ముఖ్యమంత్రి ఎ. రేవంత్ రెడ్డి పేర్కొన్నారు. ఈ నేపథ్యంలో వివిధ కార్పొరేట్ కంపెనీల ప్రతినిధులతో సమావేశం నిర్వహించి కీలక సూచనలు చేశారుసీఎస్ఆర్ వ్యయాన్ని కేవలం ఖర్చుగా కాకుండా సమాజానికి తిరిగి ఇచ్చే భాగస్వామ్యంగా భావించాలని సీఎం అన్నారు. ముఖ్యంగా విద్య, వైద్యం, జల వనరుల సంరక్షణ వంటి కీలక రంగాలకు కంపెనీలు ప్రాధాన్యం ఇవ్వాలని సూచించారు. ప్రభుత్వం, ప్రైవేట్ సంస్థలు కలిసి పనిచేస్తే రాష్ట్రంలో విద్యార్థులను ఉన్నత నైపుణ్యాలతో తీర్చిదిద్దవచ్చని సీఎం తెలిపారు. విద్యపై పెట్టే ప్రతి రూపాయి భవిష్యత్ తరాలకు పెట్టుబడిగా మారుతుందని పేర్కొన్నారు. హైదరాబాద్లోనే అధిక శాతం విద్యార్థులు ఉండటంతో, వారికి మెరుగైన విద్యా వసతులు కల్పించడంలో కార్పొరేట్ సంస్థలు ముందుకు రావాలని సీఎం కోరారు. అలాగే సంస్థలు తమ కార్యకలాపాలు ఉన్న ప్రాంతాల్లో అభివృద్ధి కార్యక్రమాలకు సీఎస్ఆర్ నిధులను వినియోగించాలని సూచించారు.సీఎస్ఆర్ నిధుల వినియోగాన్ని సమన్వయం చేయడానికి ప్రత్యేక అధికారిని నియమించామని సీఎం వెల్లడించారు. కంపెనీలు విద్య, ఆరోగ్యం, నైపుణ్యాభివృద్ధి, పర్యావరణ పరిరక్షణ వంటి రంగాల్లో తమ వంతు సహకారం అందించవచ్చని తెలిపారు.ఈ సమావేశంలో పాల్గొన్న కంపెనీలు ప్రభుత్వ చొరవను స్వాగతిస్తూ, సామాజిక అభివృద్ధి కార్యక్రమాల్లో భాగస్వామ్యం అవుతామని హామీ ఇచ్చాయి.
