ఏప్రిల్ 19, నేటి తెలుగు పత్రిక: తెలంగాణలో మౌలిక వసతుల అభివృద్ధిని మరింత వేగవంతం చేయాలనే లక్ష్యంతో ప్రభుత్వం కీలక చర్యలు తీసుకుంటోందని రాష్ట్ర రెవెన్యూ, హౌసింగ్, సమాచార పౌర సంబంధాల శాఖ మంత్రి పొంగులేటి శ్రీనివాసరెడ్డి తెలిపారు. ముఖ్యంగా వరంగల్, ఆదిలాబాద్, భద్రాద్రి కొత్తగూడెం జిల్లాల్లో ప్రతిపాదిత ఎయిర్పోర్ట్ల నిర్మాణంపై పనులు వేగంగా కొనసాగించాలని అధికారులను ఆదేశించారు. శనివారం సచివాలయంలో జరిగిన సమీక్ష సమావేశంలో ఎయిర్పోర్ట్ అథారిటీ అధికారులు, సంబంధిత విభాగాల ప్రతినిధులతో కలిసి మంత్రి ప్రగతిని సమీక్షించారు. ఈ సందర్భంగా భూ సేకరణ, సాంకేతిక అనుమతులు, మౌలిక వసతుల ఏర్పాటుపై వివరాలు తెలుసుకున్నారు. వరంగల్ ఎయిర్పోర్ట్కు సంబంధించి ఇప్పటికే సుమారు 953 ఎకరాల భూమిని రాష్ట్ర ప్రభుత్వం సేకరించి కేంద్రానికి అప్పగించినట్లు మంత్రి వెల్లడించారు. త్వరలోనే శంకుస్థాపన జరిగేలా చర్యలు తీసుకుంటామని చెప్పారు.ఆదిలాబాద్లో ప్రతిపాదిత విమానాశ్రయాన్ని రక్షణ శాఖ, పౌర విమానయాన శాఖ, రాష్ట్ర ప్రభుత్వం సంయుక్తంగా అభివృద్ధి చేయాలని నిర్ణయించినట్లు తెలిపారు. దీనికి సంబంధించి మాస్టర్ ప్లాన్ త్వరగా సిద్ధం చేయాలని అధికారులను ఆదేశించారు.భద్రాద్రి కొత్తగూడెం జిల్లాలో విమానాశ్రయం నిర్మాణానికి ముందు ఎంపిక చేసిన స్థలం అనుకూలంగా లేదని కేంద్రం సూచించిన నేపథ్యంలో, కొత్త ప్రదేశాలపై పరిశీలన చేసి సమగ్ర నివేదిక ఇవ్వాలని మంత్రి సూచించారు.కేంద్రంతో సమన్వయం చేసుకుంటూ ఈ ప్రాజెక్టులను త్వరితగతిన పూర్తి చేసే దిశగా చర్యలు కొనసాగించాలని మంత్రి పొంగులేటి స్పష్టం చేశారు. ఈ ఎయిర్పోర్ట్ల ద్వారా ప్రాంతీయ అభివృద్ధి, పెట్టుబడుల ఆకర్షణ, ఉపాధి అవకాశాలు పెరుగుతాయని ప్రభుత్వం భావిస్తోంది.
