మే 08, (నేటి తెలుగు పత్రిక): తెలంగాణలో సాగునీటి ప్రాజెక్టులపై రాజకీయ విమర్శలు మళ్లీ వేడెక్కాయి. కొమురం భీం ఆసిఫాబాద్ జిల్లా పర్యటనలో మంత్రి జూపల్లి కృష్ణారావు గత బీఆర్ఎస్ ప్రభుత్వంపై తీవ్ర విమర్శలు చేశారు. తుమ్మిడిహట్టి ప్రాజెక్టును పక్కన పెట్టి, భారీ విద్యుత్ ఖర్చుతో కూడిన కాళేశ్వరం లిఫ్ట్ ఇరిగేషన్ విధానాన్ని ఎంచుకోవడం వల్ల రాష్ట్రంపై ఆర్థిక భారం పెరిగిందని ఆరోపించారు. రైతులు, స్థానిక ప్రజాప్రతినిధులతో సమావేశమైన మంత్రి మాట్లాడుతూ.. “సహజ ప్రవాహం ద్వారా నీరు వచ్చే అవకాశం ఉన్నప్పుడు, అధిక విద్యుత్ వినియోగంతో నీటిని ఎత్తిపోసే విధానాన్ని ఎందుకు తీసుకొచ్చారో ప్రజలకు చెప్పాలి” అని ప్రశ్నించారు. 2008లో సుమారు 16 లక్షల ఎకరాలకు సాగునీరు అందించాలనే లక్ష్యంతో తుమ్మిడిహట్టి ప్రాజెక్టు ప్రారంభమైందని, తర్వాత దాన్ని కాళేశ్వరం పేరుతో రీ-డిజైన్ చేశారని పేర్కొన్నారు. దీంతో సిర్పూర్, ఆసిఫాబాద్, బెల్లంపల్లి ప్రాంతాల రైతులకు అన్యాయం జరిగిందని విమర్శించారు.తుమ్మిడిహట్టి ద్వారా సహజ ప్రవాహంతో నీరు అందించే అవకాశం ఉండేదని, కానీ రాజకీయ, ఆర్థిక ప్రయోజనాల కోసం భారీ లిఫ్ట్ ఇరిగేషన్ ప్రాజెక్టును నిర్మించారని జూపల్లి ఆరోపించారు. దీని వల్ల విద్యుత్ ఖర్చులు పెరిగి రాష్ట్ర ఆర్థిక వ్యవస్థపై భారం పడిందన్నారు.మేడిగడ్డ బ్యారేజ్ పిల్లర్లు కుంగిపోవడం ప్రాజెక్టు పనితీరుపై ప్రశ్నలు లేవనెత్తిందని ఆయన పేర్కొన్నారు. వేల కోట్ల రూపాయల ప్రజాధనం ఖర్చు చేసిన ప్రాజెక్టు పూర్తిస్థాయిలో ఉపయోగపడని పరిస్థితి వచ్చిందన్నారు.ప్రస్తుత కాంగ్రెస్ ప్రభుత్వం తుమ్మిడిహట్టి ప్రాజెక్టును పూర్తి చేయడానికి కట్టుబడి ఉందని మంత్రి స్పష్టం చేశారు. ముఖ్యమంత్రి రేవంత్ రెడ్డి నేతృత్వంలో ప్రాజెక్టును ముందుకు తీసుకెళ్లేందుకు చర్యలు ప్రారంభించామని తెలిపారు.తుమ్మిడిహట్టిలో 150 మీటర్ల బ్యారేజ్ నిర్మాణానికి మహారాష్ట్ర ప్రభుత్వాన్ని ఒప్పించే ప్రయత్నాలు కొనసాగుతున్నాయని వెల్లడించారు. మహారాష్ట్రలో ముంపు సమస్యలు రాకుండా సాంకేతిక మార్పులతో ప్రాజెక్టును అమలు చేస్తామని చెప్పారు.తెలంగాణలో సాగునీటి రాజకీయాలు మళ్లీ వేడెక్కుతున్న వేళ జూపల్లి వ్యాఖ్యలు రాజకీయంగా ప్రాధాన్యం సంతరించుకున్నాయి.
