పవన్ కళ్యాణ్ సీఎంగా చూడాలనేది మా లక్ష్యం: కిరణ్ రాయల్
జనసేన అధినేత పవన్ కళ్యాణ్ను ముఖ్యమంత్రిగా చూడాలనేది తమ దీర్ఘకాలక ఆకాంక్ష అని తిరుపతి జనసేన ఇన్ఛార్జ్ కిరణ్ రాయల్ వ్యాఖ్యానించారు. టీడీపీ నేతలు నారా లోకేశ్ను డిప్యూటీ ముఖ్యమంత్రిగా చూడాలని కోరుకుంటున్న సమయంలో, కిరణ్ రాయల్ చేసిన ఈ కీలక వ్యాఖ్యలు ప్రాధాన్యం సంతరించుకున్నాయి.
“ప్రతీ పార్టీకి తమ తమ కోరికలు ఉంటాయి. టీడీపీ కేడర్లో నారా లోకేశ్ను డిప్యూటీ సీఎంగా చూడాలనే అభిలాష ఉంది. అదే విధంగా జనసేన కార్యకర్తలకు పవన్ కళ్యాణ్ను ముఖ్యమంత్రిగా చూడడం మించిన లక్ష్యం లేదు. పవన్ కళ్యాణ్ను సీఎం చేయాలని గత పది సంవత్సరాలుగా ఎదురుచూస్తున్నాం,” అని కిరణ్ రాయల్ స్పష్టం చేశారు.
ఇక మెగా బ్రదర్స్ గురించి మాట్లాడుతూ, “మా దృష్టిలో మెగా బ్రదర్స్ ముగ్గురే కాదు, చంద్రబాబు నాయుడును కలిపి నలుగురు. టీడీపీ కేడర్లో లోకేష్ను డిప్యూటీ సీఎంగా చూడాలన్న కోరిక సహజమే, అయితే మా ధ్యేయం పవన్ కళ్యాణ్ సీఎం అయ్యే రోజు కోసం ఎదురుచూడటం,” అన్నారు.
ఈ వ్యాఖ్యలు రాజకీయ వర్గాల్లో చర్చనీయాంశంగా మారాయి. జనసేన-టీడీపీ మధ్య భవిష్యత్ కూటమి పొత్తులపై కూడా ఈ వ్యాఖ్యల ప్రభావం చూపవచ్చని విశ్లేషకులు భావిస్తున్నారు.
