మార్చి 14(నేటి తెలుగు పత్రిక): ఆస్పత్రుల్లో ఓపీ స్లిప్ కోసం గంటల తరబడి క్యూలైన్లలో నిలబడే సమస్యకు చెక్ పెట్టేందుకు గుంటూరు ప్రభుత్వ జనరల్ ఆసుపత్రి (జీజీహెచ్)లో కొత్త విధానాన్ని ప్రవేశపెట్టారు. ఇకపై వాట్సాప్లో “Hi” అని మెసేజ్ పంపితేనే ఓపీ టోకెన్ నంబర్ పొందే సౌకర్యాన్ని అధికారులు ప్రారంభించారు.ప్రస్తుతం ఈ విధానాన్ని ప్రయోగాత్మకంగా అమలు చేస్తున్నారు. 95523 00009 నంబర్కు వాట్సాప్లో “Hi” అని మెసేజ్ పంపితే ప్రత్యేక సాఫ్ట్వేర్ ద్వారా ఓపీ స్లిప్ జనరేట్ అవుతుంది.
ఇలా పనిచేస్తుంది
- వాట్సాప్లో 95523 00009 నంబర్కు “Hi” మెసేజ్ పంపాలి
- వచ్చిన మెను లో OP ఆప్షన్ ఎంచుకోవాలి
- ఆసుపత్రుల జాబితాలో Guntur Government General Hospital ఎంపిక చేయాలి
- ఆధార్ నంబర్, ఫోన్ నంబర్ నమోదు చేయాలి
- వెంటనే టోకెన్ నంబర్ జనరేట్ అవుతుంది
- చివరి నాలుగు అంకెలను నిర్ధారించగానే అపాయింట్మెంట్ కన్ఫర్మ్ అవుతుంది
ఎందుకు ఈ విధానం?
సుమారు 1500 పడకల సామర్థ్యం ఉన్న ఈ ఆసుపత్రికి రోజూ 4–5 వేల మంది ఓపీ రోగులు వస్తుంటారు. ఓపీ స్లిప్ కోసం ఉదయం 6 గంటల నుంచే క్యూలైన్లు ఉండటం వల్ల రోగులు తీవ్ర ఇబ్బందులు పడుతున్నారు.ఇటీవల ఆరోగ్య శాఖ కార్యదర్శి సౌరభ్ గౌర్ ఆసుపత్రిని తనిఖీ చేసినప్పుడు ఈ సమస్యను గుర్తించి వెంటనే కొత్త విధానం అమలు చేయాలని సూచించారు.ప్రస్తుతం మూడు రోజులుగా ప్రయోగాత్మకంగా అమలు చేస్తూ రోజుకు 40–60 మంది రోగులకు వాట్సాప్ ద్వారా ఓపీ స్లిప్స్ ఇస్తున్నారు. ఈ విధానం విజయవంతమైతే రాష్ట్రంలోని ఇతర ప్రభుత్వ ఆసుపత్రుల్లో కూడా అమలు చేయాలని ప్రభుత్వం భావిస్తోంది.
