మంగళగిరి మార్చి 24 ( నేటి తెలుగు పత్రిక ప్రతినిధి): మన మంగళగిరి మగ్గం చప్పుడులో ఒక లయ ఉంటుంది… మన నేతన్నల వేళ్ల కదలికల్లో ఒక ఆశ ఉంటుంది. కానీ, కుప్పం వీధుల్లో నారా భువనేశ్వరి గారు ఆ మంగళగిరి చీర కట్టుకుని నడుస్తుంటే, అది కేవలం ఒక వస్త్రంలా కాకుండా, రెండు ప్రాంతాల ప్రజల మధ్య అల్లుకున్న ఒక అపురూప అనుబంధంలా మెరిసిపోతోంది.
తనయుడిని అత్యధిక మెజారిటీతో గెలిపించి, అసెంబ్లీకి పంపిన మంగళగిరి గడ్డపై ఆమెకు ఒక ప్రత్యేకమైన కృతజ్ఞత ఉంది. ఆ కృతజ్ఞతను మాటల్లో చెప్పడం కంటే, వారు ప్రాణం పోసిన చేనేత వస్త్రాన్ని ధరించి, తన భర్త నియోజకవర్గమైన కుప్పం ప్రజల కష్టాలు వినడానికి వెళ్లడం ఆ తల్లి మనసులోని ఆత్మీయతకు నిలువుటద్దం. “మీరు నా కొడుకును ఆదరించారు.. నేను మీ కష్టాన్ని, మీ కళను గౌరవిస్తున్నాను” అనే ఒక నిశ్శబ్ద సందేశం ఆ చీరలోని ప్రతి పోగులోనూ ప్రతిధ్వనిస్తోంది.
కుప్పం పర్యటనలో ప్రజలు తమ గోడును వెళ్లబోసుకుంటూ ఇచ్చిన అర్జీలను ఆమె స్వీకరిస్తున్న తీరు చూస్తుంటే, ఆమె ఒక ఇంటి పెద్ద దిక్కులా కనిపిస్తున్నారు. ప్రతి మూడు నెలలకు ఒకసారి స్వయంగా వచ్చి సమస్యల స్థితిగతులను తెలుసుకోవడం, ఫిర్యాదులు తీసుకోగానే సంబంధిత నాయకులకు దిశానిర్దేశం చేయడం.. ఇవన్నీ ఒక బాధ్యతగా కాకుండా, ఒక అమ్మ భరోసాలా అక్కడి ప్రజలకు అందుతున్నాయి.
మంగళగిరి మగ్గాల చప్పుడును కుప్పం ప్రజల గుండె చప్పుడుతో కలిపిన ఈ దృశ్యం నిజంగానే ఒక మానవీయ కోణానికి అద్భుతమైన సాక్ష్యం. చేనేతన్నల శ్రమకు దక్కిన గౌరవం, కుప్పం ప్రజలకు లభించిన భరోసా ఒకే ఫ్రేమ్లో ఒదిగిపోయిన అరుదైన క్షణం ఇది.