మార్చి 27, నేటి తెలుగు పత్రిక: అమెరికాలోని స్మిత్సోనియన్ జాతీయ ఆసియా కళల సంగ్రహాలయం నుంచి మూడు అరుదైన పురాతన శిల్పాలు త్వరలోనే భారత్కు తిరిగి రానున్నాయి. తమిళనాడులోని దేవాలయాల నుంచి దొంగిలించబడినట్లు పరిశోధనలో తేలడంతో, ఈ విగ్రహాలను భారతదేశానికి అప్పగించేందుకు ఒప్పందం కుదిరింది.ఈ ఒప్పందంపై అమెరికాలో భారత డిప్యూటీ చీఫ్ ఆఫ్ మిషన్ నమగ్యా ఖంపా మరియు మ్యూజియం డైరెక్టర్ చేజ్ రాబిన్సన్ సంతకాలు చేశారు.
భారత్కు తిరిగి రానున్న శిల్పాలు:
- 9వ శతాబ్దానికి చెందిన శివ నటరాజ కాంస్య విగ్రహం
- 12వ శతాబ్దానికి చెందిన శివ–ఉమల (సోమస్కంద) శిల్పం
- 16వ శతాబ్దానికి చెందిన సుందరర్ దంపతుల విగ్రహాలు
పుదుచ్చేరిలోని పుదుచ్చేరి ఫ్రెంచ్ సంస్థ ఫోటో ఆర్కైవ్స్ ఆధారంగా జరిపిన పరిశోధనలో, ఈ విగ్రహాలు తమిళనాడులోని పలు ఆలయాలకు చెందినవిగా నిర్ధారించారు.శివ నటరాజ విగ్రహం తంజావూరు జిల్లాలోని ఆలయం నుంచి, సోమస్కంద విగ్రహం మన్నార్గుడి ప్రాంతం నుంచి, సుందరర్ విగ్రహం కల్లకురుచ్చి ప్రాంతం నుంచి చోరీకి గురైనట్లు తేలింది.ఈ పురాతన శిల్పాలు అక్రమంగా విదేశాలకు తరలించబడ్డాయని మ్యూజియం కూడా అంగీకరించింది. దీంతో వాటిని తిరిగి భారత్కు పంపేందుకు నిర్ణయం తీసుకుంది.భారత సాంస్కృతిక వారసత్వాన్ని కాపాడే దిశగా ఇది ఒక కీలక ముందడుగుగా భావిస్తున్నారు.
