ఏప్రిల్ 05, నేటి తెలుగు పత్రిక: సింగరేణి కాలరీస్ కంపెనీ లిమిటెడ్ కార్మికుల కోసం మరో సంక్షేమ నిర్ణయం అమల్లోకి వచ్చింది. ఇకపై కార్మికులు సహజ మరణం పొందిన సందర్భంలో వారి కుటుంబాలకు రూ.10 లక్షల ఆర్థిక సాయం అందించనున్నారు.ఇప్పటివరకు విధుల్లో ప్రమాదవశాత్తూ మరణించినప్పుడు మాత్రమే బీమా వర్తించగా, కొత్త నిర్ణయంతో సహజ మరణాలకు కూడా ఈ ప్రయోజనం విస్తరించారు. ఈ పథకం ఏప్రిల్ 1 నుంచి అమల్లోకి వచ్చినట్లు సంస్థ వర్గాలు వెల్లడించాయి.ఈ బీమా అమలుకు యూనియన్ బ్యాంక్ ఆఫ్ ఇండియాతో ఒప్పందం కుదిరింది. యూనియన్ బ్యాంకులో జీత ఖాతా ఉన్న కార్మికులకు ఈ సదుపాయం అందుతుంది. ఇతర బ్యాంకులు కూడా త్వరలో ఈ విధానాన్ని అనుసరించే అవకాశం ఉంది.ఇప్పటికే ప్రమాద మరణాలపై రూ.1 కోటి వరకు బీమా సదుపాయం అందుతున్న నేపథ్యంలో, కొత్తగా సహజ మరణాలకూ ఆర్థిక భరోసా కల్పించడం కార్మిక కుటుంబాలకు ఉపశమనం కలిగిస్తోంది.ఈ పథకానికి కార్మికులు ఎలాంటి ప్రీమియం చెల్లించాల్సిన అవసరం లేకుండా, మొత్తం వ్యయాన్ని బ్యాంకే భరిస్తుంది. దీంతో కార్మికుల సంక్షేమానికి మరింత బలమైన రక్షణ వలయం ఏర్పడింది.
సింగరేణి కార్మికులకు గుడ్న్యూస్.. సహజ మరణానికీ రూ.10 లక్షల బీమా
