ఏప్రిల్ 20, నేటి తెలుగు పత్రిక: ఆంధ్రప్రదేశ్ ముఖ్యమంత్రి నారా చంద్రబాబు నాయుడుకు జనసేన అధినేత పవన్ కళ్యాణ్ హృదయపూర్వక జన్మదిన శుభాకాంక్షలు తెలిపారు. ఆయనకు సంపూర్ణ ఆయురారోగ్యాలు, ఆనందం కలగాలని భగవంతుణ్ణి ప్రార్థించారు.ఈ సందర్భంగా పవన్ కళ్యాణ్ మాట్లాడుతూ, ముఖ్యమంత్రిగా సుదీర్ఘ అనుభవం కలిగిన చంద్రబాబు నాయుడు తన దూరదృష్టితో రాష్ట్రాన్ని అభివృద్ధి దిశగా నడిపిస్తున్నారని పేర్కొన్నారు. రాజధాని నిర్మాణం, పోలవరం ప్రాజెక్ట్ పూర్తి వంటి కీలక లక్ష్యాలతో ముందుకు సాగుతున్నారని తెలిపారు.రాష్ట్రాన్ని పెట్టుబడులకు ఆకర్షణీయ కేంద్రంగా తీర్చిదిద్దుతూ యువతకు ఉపాధి, ఉద్యోగావకాశాలు కల్పించడంపై దృష్టి సారిస్తున్నారని అన్నారు. “మంచి ప్రభుత్వం” అనే నినాదాన్ని ఆచరణలో చూపిస్తూ, అన్ని రంగాల్లో ఆంధ్రప్రదేశ్ను ముందంజలో నిలిపేలా ఆయన పాలన కొనసాగుతోందని పవన్ కళ్యాణ్ అభిప్రాయపడ్డారు.చంద్రబాబు నాయకత్వంలో రాష్ట్రం మరింత అభివృద్ధి సాధించి, ప్రజల ఆశలను నెరవేర్చాలని ఆకాంక్షించారు.
