ఏప్రిల్ 25, (నేటి తెలుగు పత్రిక): తెలంగాణ రాజకీయాల్లో కీలక పరిణామం చోటుచేసుకుంది. మాజీ ఎమ్మెల్సీ కల్వకుంట్ల కవిత సరికొత్త రాజకీయ పార్టీని ప్రకటిస్తూ రాజకీయ వాతావరణాన్ని ఒక్కసారిగా వేడెక్కించారు. మేడ్చల్ జిల్లా మునీరాబాద్లో నిర్వహించిన భారీ సభలో ఆమె తన పార్టీకి ‘తెలంగాణ రాష్ట్ర సేన (TRS)’ అనే పేరును ప్రకటించారు. గతంలో కె. చంద్రశేఖర్ రావు స్థాపించిన టీఆర్ఎస్ పేరునే మళ్లీ రాజకీయ వేదికపైకి తీసుకురావడం విశేషంగా మారింది.సభలో మాట్లాడిన కవిత భావోద్వేగానికి లోనయ్యారు. తెలంగాణ ఉద్యమంలో తన పాత్రను గుర్తుచేసుకుంటూ, ప్రస్తుత రాజకీయ పరిస్థితులపై అసంతృప్తి వ్యక్తం చేశారు. రాష్ట్రం దారి తప్పిందని, సామాజిక తెలంగాణ లక్ష్యాలు పక్కకు వెళ్లాయని విమర్శించారు. గత పాలనలో జరిగిన కొన్ని అంశాలపై బాధ వ్యక్తం చేస్తూనే, తెలంగాణ సాధనలో భాగమైనందుకు గర్వంగా ఉందన్నారు.తమ పార్టీ అధికారంలోకి వస్తే అమలు చేసే విధానాలను ‘పాంచజన్యం’ పేరుతో ప్రకటించారు. ఇందులో భాగంగా ఉచిత విద్య, ఉచిత వైద్యం, రైతుకు ప్రాధాన్యం, యువతకు ఉపాధి అవకాశాలు, సామాజిక న్యాయం వంటి ఐదు కీలక హామీలను వెల్లడించారు. ముఖ్యంగా యువతకు భారీ స్థాయిలో రుణాలు, ఉద్యోగాల కల్పనపై దృష్టి సారిస్తామని చెప్పారు.ఈ ప్రకటనపై ఇతర పార్టీల నుంచి స్పందనలు వెల్లువెత్తాయి. భారత రాష్ట్ర సమితి నేతలు తీవ్రంగా స్పందిస్తూ, పాత పార్టీ పేర్లను పోలిన పేర్లతో కొత్త పార్టీకి అనుమతి ఉండదని పేర్కొన్నారు. ఇది ప్రజలను గందరగోళానికి గురిచేసే ప్రయత్నమని విమర్శించారు. ఇక భారతీయ జనతా పార్టీ రాష్ట్ర నాయకత్వం కూడా స్పందిస్తూ, తెలంగాణలో ఎన్ని పార్టీలు వచ్చినా తమపై ప్రభావం ఉండదని తెలిపింది. ప్రజలు అభివృద్ధి, అవినీతి రహిత పాలన కోరుకుంటున్నారని, భవిష్యత్తులో బీజేపీదే ఆధిపత్యమని ధీమా వ్యక్తం చేసింది. మొత్తంగా కవిత కొత్త పార్టీ ‘టీఆర్ఎస్’ ఆవిర్భావంతో తెలంగాణ రాజకీయాలు మరోసారి ఉత్కంఠభరితంగా మారాయి. రానున్న రోజుల్లో ఈ పార్టీ ప్రభావం ఎలా ఉండబోతోందన్నది ఆసక్తికరంగా మారింది.
తెలంగాణ రాజకీయాల్లో కొత్త మలుపు.. కవిత ‘టీఆర్ఎస్’.. బీజేపీ, బీఆర్ఎస్ రియాక్షన్
