ఏప్రిల్ 25, (నేటి తెలుగు పత్రిక): తెలంగాణలో జనగణన ప్రక్రియకు సంబంధించి సన్నాహాలు వేగంగా కొనసాగుతున్నాయి. రాష్ట్ర జనగణన డైరెక్టర్ భారతి హోళికెరె మీడియాతో మాట్లాడుతూ జనాభా లెక్కల సేకరణకు సంబంధించిన కీలక వివరాలను వెల్లడించారు. రాష్ట్రంలోని ప్రతి ఇల్లు, ప్రతి నిర్మాణాన్ని ఖచ్చితంగా నమోదు చేసేలా ప్రత్యేక చర్యలు చేపడుతున్నామని తెలిపారు.ఈ జనగణనలో కేవలం నివాస గృహాలే కాకుండా ఆసుపత్రులు, పాఠశాలలు, దేవాలయాలు, అద్దె భవనాలు, గుడిసెలు వంటి అన్ని రకాల నిర్మాణాలను పరిగణనలోకి తీసుకోనున్నారు. ఒకే భవనంలో ఉన్న ప్రతి కుటుంబాన్ని వేర్వేరుగా నమోదు చేయడం ద్వారా సమగ్ర డేటాను సేకరించనున్నారు. జనగణన ప్రక్రియను రెండు దశల్లో నిర్వహించనున్నారు. మొదటి దశగా హౌస్ లిస్టింగ్ చేపట్టి, రాష్ట్రాన్ని బ్లాక్లుగా విభజించి ఎన్యుమరేటర్లను నియమిస్తారు. మే 11 నుంచి జూన్ 9 వరకు ప్రతి ఇంటిపై గుర్తులు వేస్తూ గణన ప్రక్రియను ప్రారంభిస్తారు. ఈ గుర్తులు ఆ ఇల్లు నమోదు అయిందని సూచిస్తాయి.రెండో దశగా వ్యక్తిగత జనగణనను 2027 ఫిబ్రవరిలో ప్రారంభించనున్నారు. ఈ దశలో ప్రతి వ్యక్తికి సంబంధించిన వివరాలను సేకరించి, రాష్ట్ర జనాభా నిర్మాణంపై సమగ్ర అవగాహన పొందనున్నారు.జనగణన ఆధారంగా ప్రభుత్వాలు సంక్షేమ పథకాలు, అభివృద్ధి ప్రణాళికలు రూపొందిస్తాయి కాబట్టి ఈ ప్రక్రియ అత్యంత కీలకమని అధికారులు తెలిపారు. ప్రజలు కూడా ఎన్యుమరేటర్లకు సహకరించి సరైన సమాచారం అందించాలని విజ్ఞప్తి చేశారు.
తెలంగాణలో జనగణన సన్నాహాలు వేగం.. ఇంటింటి లెక్కల కోసం ఏర్పాట్లు పూర్తి దశలో
