ఏప్రిల్ 27, (నేటి తెలుగు పత్రిక): హైదరాబాద్లోని అంబర్పేట ప్రాంతంలో భారీ అగ్నిప్రమాదం సంభవించింది. మహీంద్ర కార్ల షోరూమ్లో అకస్మాత్తుగా మంటలు చెలరేగి క్షణాల్లోనే ఉద్ధృతంగా వ్యాపించాయి. షోరూమ్లో ఉన్న వాహనాలు, ఆయిల్ వంటి మండే పదార్థాల కారణంగా మంటలు వేగంగా విస్తరించాయి.ఈ ప్రమాదంతో దట్టమైన నల్ల పొగ ఆకాశాన్ని కమ్మేసి, పరిసర ప్రాంతాల్లో భయాందోళన నెలకొంది. కిలోమీటర్ల దూరం నుంచే ఈ పొగ కనిపించడంతో స్థానికులు ఆందోళనకు గురయ్యారు. సమాచారం అందుకున్న వెంటనే అగ్నిమాపక సిబ్బంది ఘటనాస్థలానికి చేరుకుని సహాయక చర్యలు ప్రారంభించారు. పలువురు ఫైర్ ఇంజిన్లతో మంటలను అదుపు చేసేందుకు యుద్ధప్రాతిపదికన ప్రయత్నాలు కొనసాగుతున్నాయి. మంటలు ఇతర భవనాలకు వ్యాపించకుండా జాగ్రత్తలు తీసుకుంటూ సమీప ఇళ్లను ఖాళీ చేయిస్తున్నారు.ఈ ఘటన కారణంగా అంబర్పేట ప్రధాన రహదారిపై ట్రాఫిక్ను పోలీసులు నిలిపివేశారు. షోరూమ్లో ఉన్న పలు కొత్త కార్లు అగ్నికి ఆహుతైనట్లు సమాచారం. ప్రమాద సమయంలో లోపల ఎవరైనా చిక్కుకుపోయారా అనే విషయంపై స్పష్టత రావాల్సి ఉంది.ప్రాథమిక సమాచారం ప్రకారం షార్ట్ సర్క్యూట్ కారణంగానే ఈ అగ్నిప్రమాదం జరిగి ఉండవచ్చని అధికారులు అనుమానిస్తున్నారు. ఘటనపై పూర్తి వివరాలు తెలియాల్సి ఉంది.
అంబర్పేటలో మహీంద్ర షోరూమ్లో అగ్నిప్రమాదం
