ఏప్రిల్ 28, (నేటి తెలుగు పత్రిక): ఆంధ్రప్రదేశ్ ముఖ్యమంత్రి నారా చంద్రబాబు నాయుడు మంగళవారం సింహాచలం శ్రీ వరాహ లక్ష్మీ నరసింహ స్వామి ఆలయంను సందర్శించి స్వామివారిని దర్శించుకున్నారు. ఈ సందర్భంగా ఆలయ పరిసరాలు భక్తులతో కళకళలాడాయి.ఆలయానికి చేరుకున్న ముఖ్యమంత్రికి దేవస్థానం అధికారులు, అర్చకులు సంప్రదాయబద్ధంగా స్వాగతం పలికారు. అనంతరం గర్భగుడిలోకి వెళ్లి శ్రీ వరాహ లక్ష్మీనరసింహ స్వామివారిని దర్శించుకుని ప్రత్యేక పూజలు నిర్వహించారు. రాష్ట్ర ప్రజల శ్రేయస్సు, అభివృద్ధి కోసం ఆయన ప్రార్థనలు చేసినట్లు తెలిసింది.సింహాచలం ఆలయానికి ప్రత్యేకమైన సంప్రదాయంగా ప్రసిద్ధి చెందిన ‘కప్ప స్తంభం’ను ముఖ్యమంత్రి ఆలింగనం చేసుకుని మొక్కులు చెల్లించారు. ఈ ఆచారం భక్తుల విశ్వాసానికి ప్రతీకగా భావించబడుతుంది.దర్శనం అనంతరం రంగమండపంలో వేద పండితులు ముఖ్యమంత్రికి వేదాశీర్వచనం అందజేశారు. దేవస్థానం అధికారులు తీర్థప్రసాదం, శేష వస్త్రాలను అందించి, ఆలయ అభివృద్ధి పనులపై వివరాలు వెల్లడించినట్లు సమాచారం.ఈ కార్యక్రమంలో పలువురు ప్రజాప్రతినిధులు, అధికారులు పాల్గొన్నారు. భక్తుల రద్దీ దృష్ట్యా పోలీసులు కట్టుదిట్టమైన భద్రతా ఏర్పాట్లు చేసి, ట్రాఫిక్ నియంత్రణ చర్యలు చేపట్టారు. సాధారణ భక్తులకు ఎలాంటి ఇబ్బందులు కలగకుండా ప్రత్యేక ఏర్పాట్లు చేశారు.
సింహాచలం స్వామివారిని దర్శించిన సీఎం చంద్రబాబు
