ఏప్రిల్ 30, (నేటి తెలుగు పత్రిక): ఆంధ్రప్రదేశ్లో పెట్టుబడులకు అనుకూల వాతావరణం నెలకొనడంతో ప్రముఖ సంస్థలు ముందుకు వస్తున్నాయి. ఈ క్రమంలో Titan Company అనుబంధ సంస్థ టైటాన్ డిఫెన్స్ గ్రూప్ రాష్ట్రంలో పెట్టుబడులు పెట్టేందుకు ఆసక్తి చూపింది.అమరావతిలో మంత్రి బీసీ జనార్దన్ రెడ్డితో జరిగిన సమావేశంలో సంస్థ ప్రతినిధులు తమ ప్రణాళికలను వెల్లడించారు. రాష్ట్రంలో పెట్టుబడులు పెట్టే సంస్థలకు ప్రభుత్వం పూర్తి స్థాయి సహకారం అందిస్తుందని మంత్రి హామీ ఇచ్చారు. సీఎం నారా చంద్రబాబు నాయుడు నాయకత్వంలో ఆంధ్రప్రదేశ్ పెట్టుబడుల కేంద్రంగా ఎదుగుతోందని ఆయన పేర్కొన్నారు.కర్నూలు విమానాశ్రయం వద్ద ఎంఆర్వో (మెయింటెనెన్స్, రిపేర్, ఓవర్హాల్) మరియు సిమ్యులేషన్ కేంద్రాల ఏర్పాటు కోసం సంస్థ ఆసక్తి చూపుతోంది. అలాగే నంద్యాల జిల్లాలో డిఫెన్స్ తయారీ యూనిట్ స్థాపనకు కూడా ప్రణాళికలు సిద్ధం చేస్తోంది.ఏవియేషన్, ఏరోస్పేస్, డిఫెన్స్, స్పేస్ వంటి కీలక రంగాల్లో తమకు ఉన్న అనుభవాన్ని సంస్థ ప్రతినిధులు వివరించారు. శిక్షణ, పరీక్షలు, ధ్రువీకరణ, నిర్వహణ వంటి అన్ని దశల్లో ఆధునిక సౌకర్యాలు ఏర్పాటు చేయగల సామర్థ్యం తమకు ఉందని తెలిపారు.ఈ పెట్టుబడులు అమలు దశలోకి వస్తే రాష్ట్రంలో ఉపాధి అవకాశాలు పెరగడంతో పాటు పారిశ్రామిక అభివృద్ధికి కొత్త ఊపు లభించనుంది. ప్రభుత్వం–పెట్టుబడిదారుల సమన్వయంతో ఏపీ అభివృద్ధి మరింత వేగవంతం అవుతుందని అధికారులు ఆశాభావం వ్యక్తం చేస్తున్నారు.
ఏపీలో పెట్టుబడులకు టైటాన్ ఆసక్తి.. డిఫెన్స్ రంగంలో భారీ ప్రాజెక్టులు: మంత్రి బీసీ జనార్దన్ రెడ్డి
