మే 08, (నేటి తెలుగు పత్రిక): ఉన్నత విద్య కోసం దేశ విదేశాలకు వెళ్లే విద్యార్థులకు ఆర్థిక భారం తగ్గించే దిశగా ఆంధ్రప్రదేశ్ ప్రభుత్వం కీలక నిర్ణయాలు తీసుకుంటోంది. విదేశీ విశ్వవిద్యాలయాల్లో చదవాలనుకునే విద్యార్థులకు కేవలం పావలా వడ్డీకే విద్యా రుణాలు అందించే విధానాన్ని అమలు చేయాలని ముఖ్యమంత్రి నారా చంద్రబాబు నాయుడు అధికారులను ఆదేశించారు. అమరావతిలో జరిగిన జిల్లా కలెక్టర్ల సమావేశంలో పలు సంక్షేమ, అభివృద్ధి పథకాలపై సమీక్ష నిర్వహించిన సీఎం ఈ మేరకు కీలక సూచనలు చేశారు. విద్యార్థులు ఆర్థిక ఇబ్బందుల కారణంగా ఉన్నత విద్య అవకాశాలను కోల్పోకూడదనే ఉద్దేశంతో ఈ నిర్ణయం తీసుకున్నట్లు ప్రభుత్వం తెలిపింది. ముఖ్యంగా విదేశాల్లో ఉన్నత విద్య అభ్యసించాలనుకునే మధ్యతరగతి, పేద కుటుంబాల విద్యార్థులకు ఈ పథకం పెద్ద ఊరట కలిగించనుందని అధికారులు భావిస్తున్నారు. జిల్లాల వారీగా అర్హులైన విద్యార్థులను గుర్తించి, వేగంగా రుణాలు మంజూరు చేసేలా చర్యలు తీసుకోవాలని సీఎం కలెక్టర్లకు సూచించారు.జిల్లా కలెక్టర్ల సమావేశంలో సీఎం చంద్రబాబు సూపర్ సిక్స్ పథకాల అమలు, సంక్షేమ కార్యక్రమాల పురోగతి, లబ్ధిదారుల సమగ్ర డేటా సమన్వయం వంటి అంశాలపై విస్తృతంగా చర్చించారు. “తల్లికి వందనం”, “అన్నదాత సుఖీభవ”, “దీపం 2.0”, “స్త్రీ శక్తి”, “దివ్యాంగ శక్తి” వంటి పథకాల అమలు స్థితిపై అధికారుల నుంచి వివరాలు అడిగి తెలుసుకున్నారు.దీపం 2.0 పథకం కింద రాష్ట్రంలో 1.08 కోట్ల మంది లబ్ధిదారులు ఉన్నారని అధికారులు సీఎంకు వివరించారు. ఈ పథకానికి ఇప్పటివరకు సుమారు రూ.3,504 కోట్లు ఖర్చు చేసినట్లు వెల్లడించారు. మహిళా సాధికారత కోసం అమలు చేస్తున్న “స్త్రీ శక్తి” పథకానికి సంవత్సరానికి రూ.1,940 కోట్ల వ్యయం అవుతుందని తెలిపారు.అదేవిధంగా “తల్లికి వందనం” పథకం కింద 67 లక్షల మంది లబ్ధిదారులకు సుమారు రూ.10 వేల కోట్లు ఖర్చు చేస్తున్నట్లు సమావేశంలో వెల్లడించారు. ఈ పథకాల అమలులో పారదర్శకత, వేగం ఉండాలని సీఎం అధికారులను ఆదేశించారు.ఏజెన్సీ ప్రాంతాల్లో రైతుల ఆదాయం పెంచేందుకు ప్రత్యేక పంటలకు ప్రోత్సాహం ఇవ్వాలని కూడా సీఎం సూచించారు. ముఖ్యంగా కాఫీ, పసుపు, కుంకుమపువ్వు సాగును విస్తరించే దిశగా చర్యలు తీసుకుంటున్నట్లు తెలిపారు. అరకు కాఫీని అంతర్జాతీయ స్థాయిలో గ్లోబల్ బ్రాండ్గా తీర్చిదిద్దేందుకు ప్రభుత్వం ప్రత్యేక ప్రణాళికతో ముందుకు వెళ్తోందని చంద్రబాబు వెల్లడించారు.రెండు రోజుల పాటు అమరావతిలో కొనసాగుతున్న జిల్లా కలెక్టర్ల సమావేశంలో పరిపాలన, సంక్షేమ పథకాలు, అభివృద్ధి కార్యక్రమాలపై విస్తృత సమీక్ష కొనసాగుతోంది. ప్రభుత్వ సేవలు ప్రజలకు మరింత వేగంగా, సమర్థవంతంగా అందేలా అధికార యంత్రాంగం పని చేయాలని సీఎం స్పష్టం చేశారు.
