రియల్ ఎస్టేట్ రంగ సమస్యల పరిష్కారంలో ప్రభుత్వం దృఢ నిర్ణయాలు

రియల్ ఎస్టేట్ రంగ సమస్యల పరిష్కారంలో ప్రభుత్వం దృఢ నిర్ణయాలు: మంత్రి నారాయణ

విజయవాడ: గత ప్రభుత్వ హయాంలో ప్రజలు, బిల్డర్లు అనేక సమస్యలు ఎదుర్కొన్నారని, ప్రస్తుతం ఆ ఇబ్బందులను తీర్చేందుకు పటిష్ఠ చర్యలు తీసుకుంటున్నామని పురపాలక శాఖ మంత్రి నారాయణ (Minister Narayana) తెలిపారు. విజయవాడలో జరిగిన మీడియా సమావేశంలో మంత్రి మాట్లాడుతూ, రియల్ ఎస్టేట్ రంగంలో అవకతవకలు నివారించేందుకు కమిటీని ఏర్పాటు చేస్తున్నామని వెల్లడించారు.

రెరా దృష్టిలో వినియోగదారుల హక్కులు

అపార్ట్మెంట్లు, లే అవుట్ల కొనుగోళ్లలో వినియోగదారులు మోసపోవకుండా రియల్ ఎస్టేట్ రెగ్యులేటరీ అథారిటీ (రెరా) కఠిన చర్యలు తీసుకుంటోందని మంత్రి తెలిపారు. బిల్డర్లు, వినియోగదారుల మధ్య ఒప్పందాలు సక్రమంగా అమలు అవుతున్నాయా అన్న విషయాన్ని రెరా పర్యవేక్షిస్తుందని స్పష్టంచేశారు.

టీడీఆర్ బాండ్ల జారీపై చర్యలు

తణుకులో టీడీఆర్ బాండ్ల జారీకి సంబంధించిన అవకతవకల కారణంగా వాటిని నిలుపుదల చేసినట్లు మంత్రి తెలిపారు. గతంలో తణుకు, గుంటూరు, తిరుపతిలో జారీ చేసిన టీడీఆర్ బాండ్ల వ్యవహారంపై ఏసీబీ విచారణ జరుగుతోందని వెల్లడించారు.
ప్రస్తుతం రాష్ట్రంలో 822 టీడీఆర్ లు పెండింగ్లో ఉండగా, కొత్తగా 521 దరఖాస్తులు వచ్చినట్లు తెలిపారు. అత్యధిక దరఖాస్తులు విశాఖలో ఉండగా, అమరావతిలోనూ టీడీఆర్ బాండ్లు జారీ ప్రక్రియ కొనసాగుతోందని వివరించారు.

ప్రాంతీయ విద్వేషాలు రెచ్చగొట్టొద్దు: పవన్ కళ్యాణ్

రియల్ ఎస్టేట్ రంగం కోసం ప్రభుత్వ లక్ష్యాలు

రాష్ట్రంలో రియల్ ఎస్టేట్ రంగం ఎలాంటి ఇబ్బందులు ఎదుర్కొనకుండా చూడటమే ప్రభుత్వ ప్రధాన లక్ష్యమని మంత్రి నారాయణ పేర్కొన్నారు. రెరాలో అనుమతులను ఇకపై ఆన్‌లైన్ ద్వారా జారీ చేయాలని నిర్ణయించినట్లు తెలిపారు. చట్ట ప్రకారం అన్ని చర్యలు తీసుకుంటామన్న ఆయన, సమస్యల పరిష్కారానికి కమిటీ రూపొందించి, ఇతర రాష్ట్రాల్లో అమలు చేస్తున్న విధానాలను అధ్యయనం చేయిస్తామన్నారు.

వినియోగదారుల కోసం మరింత సౌలభ్యం

రెరా చర్యలు వినియోగదారుల హక్కులను రక్షించేందుకు చిత్తశుద్ధితో ముందుకు వెళ్తున్నాయని మంత్రి నారాయణ తెలిపారు. ప్రభుత్వం తీసుకుంటున్న చర్యలతో రియల్ ఎస్టేట్ రంగం మరింత పటిష్ఠంగా ఎదగనున్నదని విశ్వాసం వ్యక్తం చేశారు.