కాకినాడ పోర్టు సెజ్ కేసులో విచారణ పూర్తిచేసిన ఈడీ – ఎంపీ విజయసాయి రెడ్డి కీలక వ్యాఖ్యలు
కాకినాడ పోర్టు సెజ్కి సంబంధించిన కేసులో వైకాపా ఎంపీ విజయసాయి రెడ్డి ఈడీ విచారణ ముగిసింది. ఆరు గంటల పాటు జరిగిన ఈ విచారణ అనంతరం ఆయన మీడియాతో మాట్లాడారు.
“అధికారులు మొత్తం 25 ప్రశ్నలు అడిగారు. కేవీ రావు చేసిన ఆరోపణలపై నన్ను ప్రశ్నించారు. కానీ కేవీ రావు ఎవరో నాకు తెలియదు. ఆయన నా పేరు ఎందుకు చెప్పారో కూడా తెలియదు. ఆయన్ని నేనెక్కడా కలవలేదు,” అని విజయసాయి రెడ్డి స్పష్టం చేశారు.
అంతేకాక, “కాకినాడ సీ పోర్టు గురించి నేను కేవీ రావుకు ఎప్పుడూ ఫోన్ చేయలేదు. ఆయన విన్నపాలు నిజమైతే, తిరుమల వెంకటేశ్వరస్వామి ఎదుట నిజానిజాలు చెప్పాలని ఆయన్ని కోరుతున్నా. స్వామి సమక్షంలో ఏవైనా విషయాలు స్పష్టతనివ్వగలను,” అని ఆయన వ్యాఖ్యానించారు.
ఈ కేసు నేపథ్యాన్ని పరిశీలిస్తే, వైకాపా ప్రభుత్వ హయాంలో కాకినాడ సీ పోర్ట్స్ లిమిటెడ్ (కేఎస్పీఎల్), కాకినాడ సెజ్ (కేసెజ్)లో రూ.3,600 కోట్ల విలువైన షేర్లను కర్నాటి వెంకటేశ్వరరావు (కేవీ రావు) నుంచి బలవంతంగా లాక్కున్నట్లు ఆరోపణలు వచ్చాయి. ఈ ఘటనపై ఏపీ సీఐడీ కేసు నమోదు చేయగా, దాని ఆధారంగా ఈడీ కూడా దర్యాప్తు చేపట్టింది.
ఈ క్రమంలో ఎంపీ విజయసాయిరెడ్డికి ఈడీ నోటీసులు జారీచేసింది. మొదట పార్లమెంట్ సమావేశాల కారణంగా హాజరుకాలేదు. తర్వాత మళ్లీ ఇచ్చిన నోటీసులపై నేడు విచారణకు హాజరై, తన వాదనను అధికారులు ముందు ఉంచారు.
ఈ విచారణకు సంబంధించి ఇంకా ఏమేం అంశాలు బయటకు వస్తాయో వేచిచూడాలి.