సర్వైకల్ క్యాన్సర్‌పై భారీ యుద్ధం… నేడు దేశవ్యాప్తంగా ఉచిత HPV టీకా ప్రారంభం

• 14–15 ఏళ్ల బాలికలకు ఉచిత హెచ్‌పీవీ వ్యాక్సిన్
• నరేంద్ర మోదీ చేతుల మీదుగా జాతీయ కార్యక్రమ ప్రారంభం
• రాజస్థాన్‌లోని అజ్మీర్ వేదికగా టీకా పంపిణీకి శ్రీకారం
• ఏటా కోటి పైగా బాలికలకు టీకా లక్ష్యం
• గర్భాశయ క్యాన్సర్ నివారణే ప్రధాన ఉద్దేశం

ఫిబ్రవరి 28(నేటి తెలుగు పత్రిక): బాలికల్లో పెరుగుతున్న సర్వైకల్ క్యాన్సర్ ముప్పును తగ్గించేందుకు కేంద్ర ప్రభుత్వం దేశవ్యాప్తంగా ఉచిత హెచ్‌పీవీ (HPV) టీకా కార్యక్రమాన్ని ప్రారంభించింది. ఈ జాతీయ వ్యాక్సినేషన్ కార్యక్రమాన్ని ప్రధాని నరేంద్ర మోదీ రాజస్థాన్‌లోని అజ్మీర్ నుంచి ప్రారంభిస్తున్నారు.ప్రస్తుతం 14, 15 ఏళ్ల బాలికలకు ప్రభుత్వ ఆరోగ్య కేంద్రాల్లో ఉచితంగా గార్డాసిల్-4 టీకా అందించనున్నారు. రెండు డోసులుగా ఈ వ్యాక్సిన్ ఇస్తారు. ఏటా సుమారు 1.15 కోట్లు (11.5 మిలియన్లు) బాలికలకు టీకాలు వేయాలని లక్ష్యంగా పెట్టుకున్నారు. తెలుగు రాష్ట్రాల్లో దశలవారీగా సుమారు 6.75 లక్షల మందికి టీకాలు అందించనున్నారు.

HPV టీకా ఎందుకు కీలకం?

హ్యూమన్ పాపిలోమా వైరస్ (HPV) వల్ల గర్భాశయ క్యాన్సర్ ప్రధానంగా వస్తుంది. భారతదేశంలో మహిళల్లో రెండో అత్యంత సాధారణ క్యాన్సర్‌గా ఇది గుర్తించబడింది. ప్రతి ఏడాది సుమారు 80,000 కొత్త కేసులు, 42,000కు పైగా మరణాలు నమోదవుతున్నాయని అంచనా.ఈ టీకా గర్భాశయ క్యాన్సర్ నుంచి దాదాపు 98% వరకు రక్షణనిస్తుంది. ముఖ్యంగా 9–14 ఏళ్ల మధ్య వయస్సులో తీసుకుంటే అత్యంత ప్రభావవంతంగా ఉంటుంది. చిన్న వయస్సులో రోగనిరోధక శక్తి బలంగా స్పందించడం వల్ల మెరుగైన రక్షణ లభిస్తుంది.

అభివృద్ధి చెందిన రాష్ట్రాలే దేశానికి బలం: నారా లోకేష్

అంతర్జాతీయ స్థాయిలో అమలు

2006లో అందుబాటులోకి వచ్చిన ఈ వ్యాక్సిన్ ఇప్పటికే 160 దేశాల్లో అమల్లో ఉంది. ప్రపంచవ్యాప్తంగా 50 కోట్లకు పైగా డోసులు పంపిణీ అయ్యాయి. అనేక దేశాల్లో గర్భాశయ క్యాన్సర్ కేసులు గణనీయంగా తగ్గినట్లు అధ్యయనాలు సూచిస్తున్నాయి.

జాగ్రత్తలు – స్క్రీనింగ్ కూడా అవసరం

టీకా తీసుకోవడం ఎంత ముఖ్యమో, క్రమం తప్పకుండా స్క్రీనింగ్ చేయించుకోవడం కూడా అంతే అవసరం.
ఈ లక్షణాలు కనిపిస్తే వెంటనే వైద్యుడిని సంప్రదించాలి:

శానిటేషన్ నుంచి ఫుడ్ సేఫ్టీ వరకు కఠిన చర్యలు.. కోర్ అర్బన్ రీజియన్‌పై సీఎం ఫోకస్

• అసాధారణ రక్తస్రావం
• పీరియడ్స్ మధ్య రక్తస్రావం
• దుర్వాసనతో కూడిన యోని ఉత్సర్గ
• రుతువిరతి తర్వాత రక్తస్రావం

నివారణే ఉత్తమ ఆయుధమన్న భావనతో కేంద్ర ప్రభుత్వం ఈ కీలక కార్యక్రమాన్ని ప్రారంభించింది. జననేంద్రియ పరిశుభ్రత, సమయానికి టీకా, క్రమం తప్పని పరీక్షలు ఈ మూడు పాటిస్తే గర్భాశయ క్యాన్సర్‌ను పూర్తిగా నియంత్రించవచ్చని నిపుణులు సూచిస్తున్నారు.