మార్చి 14(నేటి తెలుగు పత్రిక): ఇటీవల సోషల్ మీడియాలో హీరో రాజశేఖర్ కు గోటీల (గోళీలు) ఫ్యాక్టరీ ఉందని, అక్కడ ఉద్యోగాలు కూడా ఇస్తున్నారంటూ కొన్ని వీడియోలు వైరల్ అవుతున్నాయి. అయితే ఈ ప్రచారంపై ఆయన భార్య, నటి జీవిత రాజశేఖర్ స్పందిస్తూ కీలక వ్యాఖ్యలు చేశారుకొన్ని రోజులుగా ఫేస్బుక్, ఇన్స్టాగ్రామ్, యూట్యూబ్ వంటి సోషల్ మీడియా ప్లాట్ఫార్మ్లలో రాజశేఖర్ గోటీల ఫ్యాక్టరీ అంటూ ఫోటోలు, వీడియోలు విస్తృతంగా షేర్ అవుతున్నాయి. సినిమా అవకాశాలు తగ్గడంతో రాజశేఖర్ ఫ్యాక్టరీ ప్రారంభించారని, అక్కడ ఉద్యోగాలకు లక్షల్లో జీతాలు ఇస్తున్నారంటూ ప్రచారం జరుగుతోంది.అయితే తాజాగా ఓ సినిమా ఈవెంట్లో పాల్గొన్న జీవిత రాజశేఖర్ ఈ వార్తలను పూర్తిగా ఖండించారు. రాజశేఖర్ పేరుతో ఎలాంటి గోటీల ఫ్యాక్టరీ లేదని, సోషల్ మీడియాలో జరుగుతున్నది పూర్తిగా ఫేక్ ప్రచారమేనని స్పష్టం చేశారు.
“అసలు ఆ గోటీల ఫ్యాక్టరీలేమిటో మాకు కూడా అర్థం కావడం లేదు. నేను, మా ఆయన, మా పిల్లలు ఆ పోస్టులు చూసి నవ్వుకుంటున్నాం. ఈ మధ్య సోషల్ మీడియాలో నిజం-అబద్ధం తేడా తెలియకుండా చాలా ఫేక్ వార్తలు వస్తున్నాయి” అని ఆమె అన్నారు.ఇంకా కొందరు ఈ ఫేక్ ప్రచారాన్ని ఉపయోగించి నిరుద్యోగులను మోసం చేసి డబ్బులు వసూలు చేస్తున్నారని విన్నామని, అలాంటి పోస్టులను నమ్మకూడదని ప్రజలకు ఆమె సూచించారు. పూర్తి సమాచారం తెలుసుకున్న తర్వాత మాత్రమే నమ్మాలని కోరారు.దీంతో హీరో రాజశేఖర్ గోటీల ఫ్యాక్టరీ వార్తలు పూర్తిగా కల్పితమని జీవిత రాజశేఖర్ స్పష్టత ఇచ్చారు.
