మార్చి 21, నేటి తెలుగు పత్రిక: దేశంలోని జాతీయ రహదారుల పర్యవేక్షణ మరింత ఆధునికంగా మారుతోంది. భారత జాతీయ రహదారుల అథారిటీ (NHAI) కీలక నిర్ణయం తీసుకుని, ఆర్టిఫిషియల్ ఇంటెలిజెన్స్ (AI) ఆధారిత డాష్క్యామ్ పర్యవేక్షణ వ్యవస్థను అమలు చేయడానికి సిద్ధమైంది. ఈ ప్రణాళిక దేశవ్యాప్తంగా సుమారు 40,000 కిలోమీటర్ల జాతీయ రహదారులను కవర్ చేయనుంది.ఈ వ్యవస్థలో భాగంగా రూట్ పెట్రోల్ వాహనాలకు ప్రత్యేక కెమెరాలను అమర్చుతారు. ఇవి హై రిజల్యూషన్ వీడియోలు, చిత్రాలను సేకరించి, AI సాంకేతికత ద్వారా విశ్లేషిస్తాయి. గుంతలు, పగుళ్లు, లేన్ మార్కింగ్ లోపాలు, వీధి దీపాల సమస్యలు, క్రాష్ బారియర్లు దెబ్బతినడం వంటి 30కి పైగా రోడ్డు లోపాలను స్వయంచాలకంగా గుర్తించే సామర్థ్యం ఈ టెక్నాలజీకి ఉంది.అదే సమయంలో అక్రమ పార్కింగ్, రహదారి ఆక్రమణలపై కూడా ఈ వ్యవస్థ నిఘా ఉంచుతుంది. రహదారి భద్రతను మెరుగుపరచడానికి నెలకు కనీసం ఒకసారి రాత్రిపూట సర్వేలు కూడా నిర్వహించనుంది.ఈ మొత్తం వ్యవస్థను నిర్వహించడానికి ప్రత్యేక ఐటీ ప్లాట్ఫామ్ను NHAI అభివృద్ధి చేస్తోంది. దీని ద్వారా రహదారి పరిస్థితులను నిరంతరం పరిశీలిస్తూ, మరమ్మత్తు పనులను వేగవంతం చేయడం సాధ్యమవుతుంది.ఈ కొత్త చర్యలతో రోడ్డు ప్రమాదాలు తగ్గి, ప్రయాణికులకు మరింత సురక్షితమైన ప్రయాణ అనుభవం లభించనుందని అధికారులు ఆశాభావం వ్యక్తం చేస్తున్నారు.
భారత జాతీయ రహదారుల అథారిటీ కీలక నిర్ణయం.. హైవేలపై AI నిఘా
