ముంబై, మార్చి 27, నేటి తెలుగు పత్రిక: మహారాష్ట్ర రాజకీయాల్లో ఓ వైరల్ వీడియో తీవ్ర కలకలం రేపుతోంది. రాష్ట్ర మంత్రి నరహరి జిర్వాల్ కు సంబంధించినట్లు ప్రచారం జరుగుతున్న ఈ వీడియోపై పెద్ద ఎత్తున రాజకీయ దుమారం చెలరేగింది.వైరల్ అవుతున్న ఈ వీడియోలో జిర్వాల్ తన అధికారిక నివాసంలో ఓ ట్రాన్స్ మహిళతో అభ్యంతరకర పరిస్థితిలో ఉన్నారని ఆరోపణలు వస్తున్నాయి. ఈ నేపథ్యంలో భారత జాతీయ కాంగ్రెస్ పార్టీ తీవ్రంగా స్పందించింది. ఇది ప్రజా జీవితానికి మచ్చగా నిలుస్తుందని పేర్కొంటూ, వెంటనే మంత్రి రాజీనామా చేయాలని డిమాండ్ చేసింది. అలాగే ఆయనను కేబినెట్ నుంచి తొలగించాలని ప్రభుత్వాన్ని కోరింది.అయితే ఈ ఆరోపణలను మంత్రి జిర్వాల్ ఖండించారు. వైరల్ అవుతున్న వీడియో పూర్తిగా మార్ఫింగ్ చేసినదేనని, తనను బ్లాక్మెయిల్ చేయడానికి ఇది ఒక కుట్ర అని ఆయన పేర్కొన్నారు. వీడియోలో కనిపిస్తున్న వ్యక్తి తనకు గత ఐదేళ్లుగా పరిచయం ఉన్న వ్యక్తేనని స్పష్టం చేశారు. తనపై ఉద్దేశపూర్వకంగా తప్పుడు ప్రచారం జరుగుతోందని ఆయన ఆరోపించారు.
ఇక కాంగ్రెస్ సీనియర్ నేత విజయ్ వడెట్టివార్ ఈ ఘటనపై స్పందిస్తూ, అధికార పార్టీల మధ్య జరుగుతున్న అంతర్గత ఘర్షణలే ఈ వివాదానికి కారణమని వ్యాఖ్యానించారు. ఇది రాష్ట్ర ప్రతిష్టను దెబ్బతీస్తుందని, ప్రజల్లో అవిశ్వాసం పెంచుతుందని అన్నారు.రాష్ట్ర కాంగ్రెస్ అధ్యక్షుడు హర్ష్ వర్ధన్ సప్కల్ ఈ ఘటనను రాజకీయాల్లో నైతిక పతనానికి ఉదాహరణగా అభివర్ణించారు. ప్రజాప్రతినిధులు మర్యాద, బాధ్యతలకు కట్టుబడి ఉండాల్సిన అవసరం ఉందని అన్నారు.సామాజిక కార్యకర్త అంజలి దమానియా కూడా ఈ ఘటనపై సమగ్ర విచారణ జరపాలని డిమాండ్ చేశారు. మరోవైపు జయంత పాటిల్ ఈ వీడియోపై వ్యాఖ్యానించేందుకు నిరాకరించారు.ఈ వివాదంపై అధికారిక విచారణ జరుగుతుందా? మంత్రి భవితవ్యం ఏమవుతుంది? అన్నదానిపై రాష్ట్ర రాజకీయాల్లో ఉత్కంఠ నెలకొంది.
