మే 18, (నేటి తెలుగు పత్రిక): తెలంగాణ బీజేపీ నేత, కేంద్ర హోంశాఖ సహాయ మంత్రి బండి సంజయ్పై బీఆర్ఎస్ పార్టీ కావాలనే తప్పుడు ప్రచారం చేస్తోందని తెలంగాణ బీజేపీ అధ్యక్షుడు రామచందర్ రావు ఆరోపించారు. రాజకీయ లాభాల కోసం వ్యక్తులను, వారి కుటుంబ సభ్యులను లక్ష్యంగా చేసుకుని విమర్శలు చేయడం సరికాదని ఆయన మండిపడ్డారు.హైదరాబాద్లో మీడియాతో మాట్లాడిన రామచందర్ రావు.. బండి సంజయ్ ఎలాంటి తప్పు చేయలేదని స్పష్టం చేశారు. అయినప్పటికీ ఆయన ప్రతిష్ఠను దెబ్బతీయాలనే ఉద్దేశంతో బీఆర్ఎస్ రాష్ట్రవ్యాప్తంగా పోస్టర్లు ఏర్పాటు చేసి దుష్ప్రచారం చేస్తోందని విమర్శించారు. ప్రజా సమస్యలపై పోరాడాల్సిన పార్టీలు వ్యక్తిగత ఆరోపణలకు దిగడం రాజకీయ సంస్కృతికి విరుద్ధమన్నారు.బండి సంజయ్ కుటుంబ సభ్యులు ఎవరైనా తప్పు చేసి ఉంటే చట్టపరంగా చర్యలు తీసుకోవచ్చని, దానికి బీజేపీ ఎప్పుడూ అడ్డంకి కాదని పేర్కొన్నారు. కానీ ఆధారాలు లేకుండా బండి సంజయ్ను టార్గెట్ చేయడం వెనుక రాజకీయ కుట్ర ఉందని ఆరోపించారు. ముఖ్యంగా బీఆర్ఎస్ వర్కింగ్ ప్రెసిడెంట్ కేటీఆర్ ఉద్దేశపూర్వకంగానే బీజేపీ నేతలపై దాడులు చేస్తున్నారని విమర్శించారు.ఈ సందర్భంగా బీఆర్ఎస్ పాలనపై కూడా రామచందర్ రావు తీవ్ర విమర్శలు గుప్పించారు. బీఆర్ఎస్ హయాంలో రాష్ట్రంలో మహిళలపై నేరాలు భారీగా పెరిగాయని ఆరోపించారు. మహిళల భద్రత విషయంలో విఫలమైన నేతలు ఇప్పుడు నైతిక విలువల గురించి మాట్లాడటం విడ్డూరంగా ఉందన్నారు.జూబ్లీహిల్స్ బాలిక అత్యాచారం కేసు, ఢిల్లీ మద్యం కుంభకోణం వంటి ఘటనల్లో బీఆర్ఎస్ నేతలు ఎలా స్పందించారో ప్రజలకు తెలుసని వ్యాఖ్యానించారు. అలాగే మహిళా సర్పంచ్ వేధింపుల ఆరోపణలు చేసినప్పుడు కూడా బీఆర్ఎస్ నాయకత్వం స్పందించలేదని విమర్శించారు.తెలంగాణలో బీజేపీ బలపడుతుండటంతోనే బీఆర్ఎస్ అసహనానికి గురవుతోందని రామచందర్ రావు అన్నారు. ప్రజల్లో బీజేపీకి పెరుగుతున్న ఆదరణను తట్టుకోలేక వ్యక్తిగత విమర్శలకు దిగుతోందని ఆరోపించారు. ఎన్నికలు దగ్గరపడుతున్న సమయంలో ప్రజలను తప్పుదోవ పట్టించే ప్రయత్నాలు జరుగుతున్నాయని చెప్పారు.రాజకీయాల్లో సిద్ధాంతాలపై పోటీ పడాలని, కుటుంబ సభ్యులను లాగి విమర్శలు చేయడం ప్రజాస్వామ్యానికి మంచిది కాదని రామచందర్ రావు పేర్కొన్నారు. ప్రజలు నిజానిజాలు గమనిస్తున్నారని, తప్పుడు ప్రచారాలను నమ్మరని అన్నారు.
బండి సంజయ్పై దుష్ప్రచారం జరుగుతోంది : రామచందర్ రావు
