మే 21, (నేటి తెలుగు పత్రిక): తెలంగాణ రాష్ట్రంలోని 1 కోటి 11 లక్షల మంది కార్మికులకు రాష్ట్ర ప్రభుత్వం శుభవార్త చెప్పింది. కార్మికుల కనీస వేతనాలను పెంచుతూ ప్రభుత్వం కీలక నిర్ణయం తీసుకున్నట్లు ముఖ్యమంత్రి A. Revanth Reddy ప్రకటించారు. పెంచిన వేతనాలు జూన్ 1వ తేదీ నుంచి అమల్లోకి రానున్నట్లు వెల్లడించారు.హైదరాబాద్లోని డాక్టర్ బీఆర్ అంబేద్కర్ తెలంగాణ రాష్ట్ర సచివాలయంలో నిర్వహించిన మీడియా సమావేశంలో సీఎం ఈ నిర్ణయాన్ని ప్రకటించారు. ఈ కార్యక్రమంలో కార్మిక శాఖ మంత్రి Gaddam Vivek Venkataswamy, ఇతర ప్రజాప్రతినిధులు పాల్గొన్నారు.రాష్ట్రంలోని కార్మికులను అన్స్కిల్డ్, సెమీ స్కిల్డ్, స్కిల్డ్, హైలీ స్కిల్డ్ అనే నాలుగు విభాగాలుగా విభజించి వేతనాలను పెంచినట్లు ప్రభుత్వం తెలిపింది. అలాగే గతంలో ఉన్న అర్బన్, రూరల్ రెండు జోన్ల స్థానంలో మున్సిపల్ కార్పొరేషన్లు, మున్సిపాలిటీలు, గ్రామీణ ప్రాంతాల ఆధారంగా మూడు జోన్ల వ్యవస్థను అమలు చేయనున్నట్లు పేర్కొన్నారు. జోన్-1లో అన్స్కిల్డ్ కార్మికుల కనీస వేతనం రూ.12,750 నుంచి రూ.16 వేలకి పెంచగా, సెమీ స్కిల్డ్ కార్మికుల వేతనం రూ.13,592 నుంచి రూ.17 వేలకి పెరిగింది. స్కిల్డ్ కార్మికులకు రూ.18,500, హైలీ స్కిల్డ్ కార్మికులకు రూ.20 వేల వరకు వేతనం నిర్ణయించినట్లు సీఎం వెల్లడించారు.తెలంగాణ ఏర్పాటైన తర్వాత కార్మికుల వేతనాల పెంపుపై గత ప్రభుత్వాలు నిర్ణయం తీసుకోలేదని సీఎం విమర్శించారు. ప్రజా ప్రభుత్వం ఏర్పడ్డ తర్వాత ఉప ముఖ్యమంత్రి Bhatti Vikramarka నేతృత్వంలో మంత్రివర్గ ఉపసంఘం ఏర్పాటుచేసి కార్మిక సంఘాలు, యాజమాన్యాలు, ఇతర వర్గాలతో చర్చించి ఈ నిర్ణయం తీసుకున్నట్లు తెలిపారు. ద్రవ్యోల్బణం, నిత్యావసర ధరల పెరుగుదల, ఇంటి అద్దెల భారం వంటి అంశాలను పరిగణనలోకి తీసుకుని కార్మికుల సంక్షేమం కోసం ఈ నిర్ణయం తీసుకున్నామని సీఎం పేర్కొన్నారు. ఈ నిర్ణయం వల్ల రాష్ట్రంలోని కోట్లాది కార్మిక కుటుంబాలకు ఉపశమనం లభిస్తుందని అన్నారు.అలాగే విదేశాల్లో స్కిల్డ్ లేబర్కు భారీ డిమాండ్ ఉందని, ముఖ్యంగా గల్ఫ్ దేశాలు, పశ్చిమాసియా దేశాలకు వెళ్లే కార్మికులకు ప్రత్యేక శిక్షణ ఇచ్చే ఏర్పాట్లు చేస్తున్నట్లు తెలిపారు. ఏజెంట్ల మోసాలకు గురికాకుండా ప్రభుత్వం కార్మికులకు అండగా నిలుస్తుందని స్పష్టం చేశారు.విదేశాల్లో ప్రమాదవశాత్తు మరణించిన కార్మికుల కుటుంబాలకు రూ.5 లక్షల పరిహారం అందిస్తున్నామని గుర్తుచేసిన సీఎం, త్వరలో కార్మికుల సంక్షేమానికి మరిన్ని నిర్ణయాలు తీసుకురానున్నట్లు వెల్లడించారు.
