మే 29, (నేటి తెలుగు పత్రిక): హైదరాబాద్, రంగారెడ్డి, మేడ్చల్-మల్కాజిగిరి జిల్లాల్లో మహనీయుల విగ్రహాల ప్రతిష్ఠాపనకు సంబంధించిన సమస్యలను తక్షణమే పరిష్కరించాలని మంత్రి అడ్లూరి లక్ష్మణ్ అధికారులను ఆదేశించారు. హైదరాబాద్లో నిర్వహించిన ఉన్నతస్థాయి సమీక్ష సమావేశంలో ఆయన కీలక సూచనలు చేశారు. విగ్రహాల ఏర్పాటు విషయంలో అధికారులు, పోలీసులు పరస్పర సమన్వయంతో పని చేసి ప్రజలకు ఎలాంటి ఇబ్బందులు తలెత్తకుండా చర్యలు తీసుకోవాలని స్పష్టం చేశారు.నియమాలకు విరుద్ధంగా ఉన్న స్థలాల విషయంలో చివరి నిమిషంలో అభ్యంతరాలు చెప్పడం కాకుండా ముందుగానే నోటీసులు జారీ చేసి సమస్యలను పరిష్కరించాలని మంత్రి సూచించారు. విగ్రహాల ఏర్పాటును అడ్డుకోవడం వల్ల ప్రజల్లో ఉద్రిక్త పరిస్థితులు ఏర్పడే అవకాశం ఉందని, అందుకే సున్నితంగా వ్యవహరించాలని అధికారులకు సూచించారు. ముఖ్యంగా దళిత సంఘాల నాయకులపై అనవసర కేసులు నమోదు చేయవద్దని హెచ్చరించారు.ప్రజల భావోద్వేగాలను గౌరవించడం ప్రభుత్వ బాధ్యత అని పేర్కొన్న మంత్రి, మహనీయుల విగ్రహాలు కేవలం శిల్పాలు కాదని, అవి సామాజిక చైతన్యం, స్వాభిమానం, సమానత్వానికి ప్రతీకలని అన్నారు. డాక్టర్ బీఆర్ అంబేద్కర్, మహాత్మా జ్యోతిరావు ఫూలే, జగ్జీవన్ రామ్ వంటి మహనీయుల ఆశయాలే కాంగ్రెస్ ప్రభుత్వానికి మార్గదర్శకాలని పేర్కొన్నారు. సామాజిక న్యాయం సాధించడమే ప్రభుత్వ ప్రధాన లక్ష్యమని స్పష్టం చేశారు.విగ్రహాల ప్రతిష్ఠాపనకు సంబంధించిన వివాదాలు రాజకీయ రంగు పులుముకోకుండా ముందస్తు చర్యలు తీసుకోవాలని మంత్రి సూచించారు. ప్రజా ప్రతినిధులు, స్థానిక సంఘాలు, అధికార యంత్రాంగం కలిసి పని చేస్తే సమస్యలకు శాశ్వత పరిష్కారం లభిస్తుందని అన్నారు. విగ్రహాల ఏర్పాటులో అనుమతుల ప్రక్రియను పారదర్శకంగా, వేగంగా పూర్తి చేయాలని కూడా ఆదేశించారు.రాష్ట్రవ్యాప్తంగా మహనీయుల విగ్రహాల ఏర్పాటుపై వస్తున్న వివాదాల నేపథ్యంలో ప్రభుత్వం ప్రత్యేక దృష్టి సారించినట్లు ఈ సమావేశం ద్వారా స్పష్టమైంది. సామాజిక సమతుల్యతను కాపాడుతూ ప్రజల ఆకాంక్షలకు అనుగుణంగా నిర్ణయాలు తీసుకుంటామని మంత్రి అడ్లూరి లక్ష్మణ్ వెల్లడించారు.
విగ్రహాల ప్రతిష్ఠాపన సమస్యలు వెంటనే పరిష్కరించాలి: మంత్రి అడ్లూరి లక్ష్మణ్
