నూతన సంవత్సర సంబరాలకు కిక్: ఏపీలో మద్యం విక్రయాలకు ప్రత్యేక అనుమతులు
మందుబాబులకు ఏపీ ప్రభుత్వం నూతన సంవత్సర కానుక అందించింది. నూతన సంవత్సరం వేడుకల నేపథ్యంలో ఈరోజు (డిసెంబర్ 31) మరియు రేపు (జనవరి 1) అర్ధరాత్రి 1 గంట వరకు మద్యం విక్రయాలకు అనుమతులు ఇచ్చింది. ఈ మేరకు ప్రభుత్వం ప్రత్యేక ఉత్తర్వులు జారీ చేసింది.
తాజా ఉత్తర్వుల ప్రకారం, ఆంధ్రప్రదేశ్‌లోని అన్ని బార్‌లు, రెస్టారెంట్లు, ఈవెంట్ స్థలాలు, మరియు టూరిజం డెవలప్‌మెంట్ కార్పరేషన్ హోటళ్లలో అర్ధరాత్రి 1 గంట వరకు మద్యం అమ్మకాలు జరిపేందుకు అనుమతి ఉంది. అలాగే, వైన్ షాప్‌లు రాత్రి 12 గంటల వరకు తెరిచి ఉంచవచ్చు.
సాధారణ పరిస్థితుల్లో మద్యం విక్రయాలు రాత్రి 10 గంటల వరకు మాత్రమే అనుమతించబడతాయి. అయితే, నూతన సంవత్సరం వేడుకల సందర్భంగా అమ్మకాలు అధికమవుతాయని భావించిన ఏపీ ప్రభుత్వం, రెండు రోజుల పాటు ప్రత్యేక సమయ పొడిగింపును అమలు చేసింది.
ఈ నిర్ణయం వేడుకలకి మరింత ఉత్సాహం ఇచ్చేలా ఉంది. అయితే, మద్యం వినియోగంలో ప్రజలు బాధ్యతగా వ్యవహరించాలని అధికారులు కోరుతున్నారు.
