హైదరాబాద్‌లో మాదాపూర్ బార్ అండ్ రెస్టారెంట్‌లో అగ్నిప్రమాదం
హైదరాబాద్‌ మాదాపూర్‌లోని ఓ బార్ అండ్ రెస్టారెంట్‌లో శనివారం తెల్లవారుజామున అగ్నిప్రమాదం చోటు చేసుకుంది. రాయదుర్గం నాలెడ్జ్ సిటీ పరిధిలోని సత్వ ఎలిక్విర్ భవనంలోని ఐదో అంతస్తులో ఈ ప్రమాదం సంభవించింది. మంటలు చెలరేగడంతో భవనం పాక్షికంగా దెబ్బతింది.
ప్రమాదానికి కారణంగా భవనంలోని గ్యాస్ సిలిండర్లు పేలిపోయినట్లు అధికారులు గుర్తించారు. వెంటనే ఘటనాస్థలానికి చేరుకున్న అగ్నిమాపక సిబ్బంది రెండు ఫైరింజన్ల సాయంతో మంటలను ఆర్పేందుకు తీవ్రంగా శ్రమించారు. ప్రమాదం కారణంగా సమీపంలోని సాఫ్ట్‌వేర్ కంపెనీల ఉద్యోగులను అప్రమత్తం చేసిన అధికారులు, వారిని భవనాల నుంచి బయటకు పంపించారు.
అగ్నిప్రమాదం కారణంగా భారీ ఆస్తి నష్టం సంభవించినట్లు సమాచారం. సత్వ ఎలిక్విర్ భవనం లోపల ఎవరైనా చిక్కుకుపోయారా అన్న విషయంపై అధికారులు పరిశీలిస్తున్నారు. మంటలు పూర్తిగా ఆర్పేసిన అనంతరం నష్టం వివరాలను అంచనా వేయనున్నట్లు తెలిపారు.
ఈ ఘటనపై పోలీసు అధికారులు దర్యాప్తు ప్రారంభించారు. అగ్నిప్రమాదానికి గల కారణాలు త్వరలోనే వెల్లడించనున్నట్లు పేర్కొన్నారు.
